Duela urtebete baino gehiago iragarri zuen Eusko Jaurlaritzako Etxebizitza Sailak Orioko Munto eremuan alokairu sozialera bideratutako 46 etxebizitza eraikitzeko asmoa. Erakundeak proiektu horretara 6 milioi euro bideratuko zituela iragarri zuen.
Gaur sinatu du Eusko Jaurlaritzak Espainiako Garraio, Mugikortasun eta Hirigintza Agendako Ministerioarekin alokairu sozialeko etxebizitza horietara (beste hainbaten artean) bideratzea Europako Next Generation funtsetatik jasotako 18,5 milioi euro. Beraz, Europako funtsetatik eratorritako diruarekin finantzatuko ditu Munto eremuko alokairu sozialeko etxebizitzak Jaurlaritzak.
Duela urtebete Iñaki Arriola Eusko Jaurlaritzako Plangintza, Etxebizitza eta Garraioetako sailburuak iragarritakoaren arabera, eraikina 2023an eraikitzen hasteko asmoa daukate, eta 2026rako prest egotea aurreikusten dute.
Errekuperazio, Transformazio eta Erresilientzia Planean dago txertatuta alokairu sozialen sustapen hau. Laguntza horren bidez, energia aldetik efizienteak diren eraikinetako alokairu sozialen eskaintza hedatzea da asmoa.