Gorka Etxeberriak, Udane Ostolazak eta Aroa Sanchezek Igeldoko eta Uliako harriak altxatuko dituzte larunbatean

Gorka Etxeberria Igeldoko harria altxatzen, 2020an. (Ibon Errazu)

Iaz aurreratu zuten moduan, emakumezkoen txapelketa ere izango da aurten. 70 kilo inguruko Uliako harria altxatu beharko dute hamar harri-jasotzailek. 

Donostiako Aste Nagusiaren barruan, herri kirol munduko hitzordu garrantzitsuak jokatuko dira larunbatean: IgeldokO eta Uliako harrien txapelketak. Bertan parte hartuko dute Gorka Etxeberria, Udane Ostolaza eta Aroa Sanchez oriotarrek. 

Harri baldarren artean sona handiena duena da Igeldoko harria, eta entzutetsua da urteroko Trinitate plazako hitzordua. Aurten ere 135 kilo inguruko harri baldarra altxatu beharko dute parte hartzaileek. Joseba Ostolazaren harri eskolako Jokin Eizmendi harri-jasotzailea izan da gaur arte jaun eta jabe proba honetan. Iaz ere berak irabazi zuen, zazpigarren aldiz.

Aurtengo berrikuntza nagusia, zalantzarik gabe, Uliako harriarena izango da. Igeldoko harria txapelketan gizonezko harri-jasotzaileek soilik hartu izan dute parte orain arte baina, aurtengoan, emakumezkoen txapelketa ere izango da. 70 kilo inguruko harri baldarra da Uliako harria, eta hamar harri-jasotzaile ariko dira hura altxatzen. Tartean izango dira Udane Ostolaza eta Aroa Sanchez oriotarrak. 

Txapelketa ikustera joan nahi dutenek sarean erosi ditzakete dagoeneko. Probaren egunean bertan sarrerarik geratuko balitz, Victoria Eugenia Antzokiko leihatilan eta Trinitate plazan bertan jarriko dituzte salgai. 

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 40 euro besterik ez dira!


Izan zaitez KARKARAko laguntzaile!