San Nikolas egunez egin diete aitortza herritarrek Koldo Arrutiri, Bixente Lasari eta Jesus Makazagari; haiek dira aurtengo sanikolasetako hiru omenduak, eta kuadrillarekin batera atera dira herritarren aurrera herriko plazara, 19:15 inguruan. Anuska Esnal alkatea buru zela, udaleko zinegotzi guztiak ere izan dira omenaldian.
Esnalek umoretsu kontatu du zenbat lan egin duen kuadrillak herriko hainbat ekitaldi eta festetan era guztietako jakiak prestatzen, eta baratxuriarekin alderatu ditu. Hitz ederrak ere izan ditu haientzat; taldearen umiltasuna goraipatu du, baita besteentzat lan egitearekin sentitu duten satisfazioa azpimarratu ere. Hunkituta egon dira omenduak hainbat momentutan.
Alkatearen hitzen ondotik, Jon Agirresarobe Kultur teknikariak bertso ederrak bota dizkie, eta aitortzan ez da falta izan dantzarik –Harribilen eskutik–, musikarik –Danbolin musika eskolako bandaren eta Salatxo abesbatzaren eskutik– eta jai girorik –Pello eta Nikolasa erraldoien dantzekin–.
Omenaldia hasi aurretik, Danbolin musika eskolako bandak kontzertu bizia eskaini du plazan bertan, era guztietako doinuak eskainiz plaza bete jenderi, eta merezitako txalo zaparradak jaso ditu.
(Laster omenaldiaren eta musika bandaren bideoak hemen ikusgai).
