Errioa, gure nortasuna izenburupean, Orioko Udalak liburuxka bat banatu zuen abenduan herriko etxebizitza guztietan, Biziberritze Planaren aterkipean. Herriaren historia eta itsas ondarea biltzen dituen errelatoa sortzeko helburuarekin plazaratu zuten liburuxka.
Gaian sakontzen jarraitzeko xedearekin, hitzaldi ziklo bat antolatu du orain udaleko Turismo sailak. Azaldu dutenez, "herriak azken mendeetan izandako bilakaera" alorrez alor aztertu nahi dute. Otsailetik maiatzera bitarteko denbora tartean, bost hitzaldi egingo dira Arraunetxen, Oriok mendez mende izandako eboluzioa alorrez alor aztertzeko.
Erriotik abiatuta
Oria ibaiak herriaren bilakaeran izan duen garrantzia bistaratu nahi du udalak, eta xede horrekin dihardute lanean azken hilabeteetan. Azaldu dutenez, lehengo astean aurkeztutako Biziberritze Planeko lehen ekintza izan zen liburuxkako errelatoaren sorrera. Orain, "errelatua sortzeko egindako ikerketa-lana herritarrei modu zabal eta hurbilean" azaldu nahi diete, eta horretarako antolatu dituzte hitzaldiak.
Datorren asteazkenean, otsailaren 23an, egingo da lehen saioa Arraunetxen, 19:00etatik aurrera. Xabier Alberdi historialariarekin ekingo zaio zikloari, eta Itsas Museoko zuzendariak Oriotarrak itsasoan barrena XVI. mendean hitzaldia emango du.
Hitzaldi-sorta osoa grabatzeko asmoa agertu du udalak, eta bideoak orio.eus webgunean jarriko dituzte ikusgai.
Hau da Errioa, gure nortasuna hitzaldi zikloaren programazioa:
- Otsailak 23, Oriotarrak itsasoan barrena XVI. mendean hitzaldia, Xabier Alberdi Lonbide Historian doktore eta Itsas Museoko zuzendariaren eskutik.
- Martxoak 30, Oriotarrak Pizkunde garaian: XVI. mendeko euskal kostaldeko gizartearen ikuspegi bat hitzaldia, Iosu Etxezarraga Ortuondo Historian adituaren eskutik.
- Apirilak 27, Ontzigintza Orion. XVI. mendetik XX. mendera hitzaldia, Lourdes Odriozola Oiarbide Historian doktorearen eta Jesus Mari Perona Lertxundi ontzioletan adituaren eskutik.
- Maiatzak 11, Sargazoetatik Orioraino: aingiraren bidaia miresgarria hitzaldia, Esti Diaz Silvestre Biologian doktore eta AZTIko ikertzailearen eskutik.
- Maiatzak 25, Orioko natur ondarea: ezkutuko altxorrak, agerian hitzaldia, Arturo Elosegi Irurtia EHUko Ekologia katedradun eta Herrio natur-taldeko kidearen eskutik.
